काठमाडौं, ११ भदौ । राष्ट्रियसभाको बैठक आइतबार दिउँसो १ बजे बस्ने भएको छ । बैठकमा राष्ट्रिय सभाका सचिव राजेन्द्र फुयालले सम्माननीय राष्ट्रपतिबाट पुनर्विचारका लागि फिर्ता पठाइएको नागरिकता विधेयकका सम्बन्धमा राष्ट्रपतिको कार्यालयबाट प्राप्त पत्रबारे जानकारी गराउने सम्भावित कार्यसूची रहेको छ ।

प्रतिनिधिसभाबाट पारित बीमा विधेयक २०७५, पशु स्वास्थ्य तथा पशु सेवा परिषद् विधेयक, सार्वजनिक ऋण व्यवस्थापन विधेयक तथा अन्य केही विधेयकमाथि छलफल हुने कार्यसूची संसद सचिवालयले सार्वजनिक गरेको छ ।

नागरिकता विधेयक यसअघि प्रतिनिधि सभा र राष्ट्रिय सभाबाट पारी गत साउन १६ गते प्रमाणीकरणको लागि राष्ट्रपति समक्ष पठाएको थियो । तर राष्ट्रपति विद्यादेवी भण्डारीले सो विधेयकमा आफ्नो सन्देशसहित फिर्ता पठाएकी थिइन् ।

पछि फेरि प्रतिनिधिसभाको बैठकले गत भदौ २ गते जस्ताको तस्तै पारित गरी राष्ट्रिय सभामा पठाएको हो । अब राष्ट्रिय सभाले उक्त विधेयक जस्ताकाे तस्तै पारित गरेकाे अवस्थामा राष्ट्रपतिले प्रमाणिकरण गर्नुपर्ने छ ।